Toldot

בס״ד

Parashat Toldot

_____________________________

Introduction

Tuchung i-parasha uhi Parashat Toldot akity in, Parashat Toldot ahi - Yitzchak le Rivka chuleh acha teni hon Yakov le Esav chanchin thu ijil diu ahi. Hapta masa Parasha, (Parashat Chayei Sarah) achun Avraham in asuhpa Eliezer chu Yitzchak ding ji (wife/אישה) hol in asol in, Eliezer in Rivka ahin mu in, Yitzchak le Rivka ana kicheng lhon tai. 

Meaning Toldot - Suon le pah. Koi suon lepah kiseina ham? Yitzchak suon leh pah kiseina ahi. 

Rivka nao nei

Rikva toh Yitzchak kichen lhon kum 20 ahung lhing tai hinlah cha ana nei nai lhon poi. Ipi jeh a Pathen in cha ana nei sah lhon lou ham?

• Cha neilou kity hi nupa (Couple/זוג) khat dinga kichen man umlou tabang ahi, hinlah adihtah achu Pathen in alungset lhon jeh a cha aneisah lou ahi. Ity hichi chu lungset hithei ham? Pathen in eiho het sanga, eiho dinga pha jo ahe e. Nupa chanei lou ho khun Pathen kom a atao tao kom uve, hiche atona jal achun Pathen toh kinai jing in aum thei uve ; Pathen in cha ana neisah bei taleh ana tao hon louding, atao hon lou jeh a amani dinga thil phallou tamtah ana suh thei ahi. Hichi thil phallou achung lhona achuh nalou dinga, taona a, ahat nading abol peh ahi. Atao hat nading a cha anei vah sah lou. 
• Achunga kisei het them cheh nading in tekahna khat ve be ute. Kin khoh tah khat a chi dinga naki gut, na inn akon bus takhana nalhun chet, ahin bus driver pan bus nan kham pih lou, nachi nading mun achu aphat nalap tah lou, nalung hang, bus driver pa nagaosap jeng! Ahin, chomkhat jou in hichi bus chu a accident e kity thu najah. Nalung hang nalai dem??? Mihiem in eidinga apha kahe e kity jongle Pathen in ahet kal a kihe lou ahi. Ichunga thil suh jouse hi Pathen in eidinga phajo ahin susah ahi hijeh achu "hakol le tova" tiding thiljouse hi Pathen a Emuna neitah a hinding ahi.
• Sarah injong cha kum 75 ana ngah in, hichi phat sung achun Taona ana ha man jing e.
• Rivka injong kum 20 sung cha ana nei pon, hichi phat sung achun Pathen kom a ana tao jing e.
• Rachel injong kum 7 anato in chuin cha ana nei pan e. 
• Chana injong kum 19 chanei lou in ana um in, Pathen kom a ana tao jing in chuin Themgao Samuel ahin nei e. 

Pathen in akichen chen uvin cha ana neisah taleh, Cha nei nadinga atao hat bang uva ana tao hat lou meithei'u ahi. 

Yitzchak le Rivka chun akichen jou lhon kum 20 jou in Moria Muol chunga ah aga tao lhon in Pathen in ataona lhon asan peh in Rivka in nao ahin vop tai. Rivka naovop chu midang naovop tobang ahipoi, Athoh a athoh lal ahi. Rivka in athoh lal beh seh in hijeh chun "Phung 12 kei akon hung kisep doh ding hijongleh kathuh nat natoh akiman tapoi, ana vop da jeng taleng" aty. Hichi lai Rivka aphun jih chun Pathen in gotna api in Phung 12 chu Yaakov jinu joh akon anei sah e. 

Rivka in atho lal beh seh in hijeh chun Shem kom a ache in, kanao vop hi ipity hung tiding hinam tin aga dong tai chuleh Pathen in kachunga hepina anei nading in jong nei thum pih in aty. Shem in gao akon ahin mu in, Rikva kom a asei pih tai Nacha hi 2 hiding ahin, amani hi nam len tah 2 hung kisuh ding ahi. Ahung pien lhah jou teng leiseit pumpi jong amani kituh tah a achen khom nadinga neo ding ahi. Leiseit pumpi kisan amani kituh tah a chen khom nadinga aneo leh ity Rivka oi sung achu kituh tah a um bom thei ding ham? Apien lhah lhon nai lou vangin ahina lhon chu anu oisung akon anei pan lhon tan, kituh lou a um hon in hijeh chun Rikva in athoh lal in ahi.

Yaakov le Aisav

Yaakov le Aisav ahung pien lhon achun Aisav ahung pieng lha masa in ahi. Aisav chu ahung pien lhah in mihiem pilhing set tabang in khamul leh ha (Teeth/שיניים) kimset nei san ahung pieng lha e. Aisav in ahung pien lhah chai achun Yaakov apien thei nalouding in anu naobu chu asusih kiguo tai hinlah Yaakov in Aisav keng akitu chah kheh in ahung pien lha thou thou e. 

Ipi dinga Aisav chu Yaakov masanga hung pien masa ham?

Lengpa chapa akisil gut kon in asoh ten akisil nading mun agasuh theng set masa uve, a theng jou nung abou Lengpa chapa chu kisil ding in alut pan e. Chima bang achu Yaakov theng sel a ahung pien lhah thei nadinga Aisav hung pieng lha masa ahi.

Yaakov le Aisav akikhih na

Yaakov le Aisav chu kum 13 alhin hon chan achun aki khih lhona chu akilang naipoi. Kum 13 ahung val lhon apat chun Aisav chu gamleng mi ahung kisuh in, Yaakov vang ahinkho lhung kei in pontho tah le lunglut tah in Torah ajil. Midrash seidungjui in Yaakov sanga  Torah jil pontho ding aum poi. Aisav hi mihiem mit vetding a chu mipha tabang ahinlah asunga chu Rasah dihtah ahi. Gucha khat in alamjotna mun ah Talmid Chacham khat aum in, athat lih in, a Tzitzit chu aki ah in aga kikhom e. Hichilai kisei guchapa hi Aisav tabang ahi. "Apo kelngoi asung ngei hang"

Aisav in a upat hina akijuh doh

Avraham athi in, Yitzchak in apul adou e chijih chun Yaakov in Yitzchak adin bechiim ana hun in Aisav gilkit tah in ahung lhung in Yaakov thil hun chu athum tai. Yaakov in hepa ading kahun pih ahi (Apa dinga ahun chu mitzva ahi) nang kapih doh le ka mitzva bolding kaki mansah ding ahi aty. Na upat na nei pih dinglebou kaneh sah ding nahi aty. Aisav chun upat na pihdoh chu thil thupi in akoipoi. Hichi akon jil doh thei chu Aisav hin tonsot ding thil sangin chomkhat nupsah nading thil joh akhoh sah in ahi. Hitichun Yaakov in Aisav chu apa (Yitzchak) min in aki hahsil sah in, upat hinachu ana chang tai. 

___________________________