Miketz

בס״ד

Parashat Miketz

_____________________________

Introduction

(הקדמה)

Parashat Miketz - Miketz kity thucheng hi "akichai na" tina ahi. Ipi kichai'na kiseina ham? Yosef suongkul (Prison/בית הסוהר) um kichai nading a kum teni kiseina ahi. Yosef hi kum 12 suongkul a ana um ahi. Yosef suongkul ah aum achun Ju-vaibolpa leh An-vaibolpa mang ana lehdoh e. 

• Ju-vaibolpa (Sar ha'maskim) - Ka mang in kamasang ah lengpigui khat ana jam in, bah thum in ana jamkhen e. Apah-muun hochu ahung pal peiyin, chie'a kuon chun lenpgi thei aboh boh in ahung ga in amin pei tai. Chuleh Pharaoh khawn kana choi in lengpiga chu khawn sung ah ka meh lha'n chuin Pharaoh kaga pie tai. Yosef in ju-vaibolpa jah a "lengpi bah thum in avetsah chu nithum tina ahi, tua kuon ni thum lhin nile Pharaoh in nadomsang intin, na panmun a na pansah kit ding ahi."
• An-vaibolpa (Sar ha'ofim) - Ken jong mang khat ka neiyin, ka mang chun pocha thum in changlhah ka luchung in kana puoi. Pocha chung-nung pen a chun lengpa dia kansa changlhah jat chuom chuom ana umin, hichie hochu vacha ten ana ne uve. Yosef in An-vaibolpa jah a "mang a pocha thum na puoh chu nithum tina ahi. Tua kuon ni thum lhinni leh Paraoh in na lhadoh intin, nalu tan in tin, thingleh a nakhai ding chule vacha huon nasa aneh diu ahi" aty. 

Pharaoh mang 

(חלומות פרעה)

Yosef chu suongkul ah kum 12 ana um in itih chan aumding akihet poi, hijeh chun Pathen in Yosef kuom ah "Nachunga kathutan jat phat (Kum12) sanga phatchom khat jong naum be louding ahi" aty. Yosef suongkul a aum chu achonsetna thoidam nading ahi. 

• Kum 10 in avetsah chu asopite 10 chunga lashon hara asei jieh ahi.
• kum 2 in avetsah chu ju-vaibolpa (Sar ha'maskim) pa kuom ah "Nang dia ijakai akibol phat suoh tieng nei hin geldoh in¹ - Pharaoh hieng ah kathu nei hin sei  pieh in²" hichi thungehna ni chu ama tobang tzaddik khat dinmun adia chonset a kisim ahi hijieh achu kum 2 umbe ahi. Pathen in suongkul a aum ding phat atanjah chu tahsan na neitah ah a'nga ding ahi, hinlah Yosef in apotdoh vah thei nading in Ju-vaibolpa kuom a kithupina athum in ahi. Ju-vaibolpan Pharaoh kuom a Yosef amin phah kiguot cheng leh Pathen in ahei mil sah jin hijieh chun Pharaoh kuom a Yosef thu apha poh kha tapoi.

Kum 2 sung lhung kei chun Pharaoh in kijom in mang anei in hinlah ahung kitho tieng ageldoh thei jipoi. Kum 2 jou in Yosef ahung kilhadoh nilhah mama achun Pharaoh in mang anei kit in ageldoh thei tai. Pharaoh in mang 2 anei in chuleh aledoh najong amang achun amu pei pei e hinlha, aledoh nachu ahung khah doh in aheimil tai. 

• Pharaoh amang masa achun Nile vadung akuon in bongpi jolsel, thautah chieh sagi hamhing lah a lhalele amu in ahi. Chuin bongpi agong a gong gu doh siet siet jieng sagi ma vadung akuon chun ahung kaldoh uvin bongpi thau hochu ane doh (Vetokhalna) tauve hinlha athau be chuom dih pove. 
• Pharaoh amu kit in mang ni channa anei kit tai. A mang achun chang kung khat a changvui hoitah bohlet sagi ana keh in, chuin suolam khohui in amut heusa, changvui geu thit thet sagi ma ahung kedoh in, changvui hoitah hochu avallhum (Vehitbalna) gam tauve. 

Ajingkah in Pharaoh ahung kithou in amang kiledoh nachu ageldoh thei tapoi hijieh chun Egypt doithiem (Khartumei Mitzrayim) holeh miching ho akou khuom in amang chu aledoh sah kiguo tai. A mang lehdoh masapan hitin aledoh e "Bongpi thau sagi hon avetsah chu chanu sagi nanei ding, bongpi gong hon bongpi thau ho aneh doh chun avetsah chu nachate sagi hochu nang hin nikho sunga thigam diu ahive". Mang kildoh nachu Pharaoh alunglhei jou poi. Adang khat in hitin aledoh pieh kit e "Changvui hoitah hon avetsah chu lenggam sagi chunga gal jonna nanei ding, changvui geu thit thet hon chang hoitah ho aval lhum chun avetsah chu lenggam sagi hochun nadoumah ahinbol diu ahi". Mang kiledoh nachu Pharaoh alunglhei jou dieh poi hijieh chun Egypt gamsunga mang lehdoh thei jouse kou khom din thu apie tai. Koi tobang hichi Pharaoh thupieh nit lou chun thina chan gotna amuding ahi, hinlah ahiding banga mang lehdoh thei aumleh nasatah a kipaman akisan ding ahi.

Egypt doithiem hon Pharaoh mang ledohna 

(פרשנותם של חרטומי מצרים לחלום פרעה)

Egypt doithiem, miching chuleh hetna jat chuom chuom nei jouse chu Pharaoh kuom a hung uvin, mang ledoh dan jat chuom chuom anei uve hinlah koiman Pharaoh lungdei bangin alehdoh thei pouve. Ipi dinga koiman Pharaoh lungdei banga mang aledoh pieh thei lou'u ham? Ajieh chu Pathen in Yosef a ledoh sah nom jieh a ahetnau jouse asuh mang pieh ahi. Yosef chun Pharaoh mang chu ana leh masapen taleh Egypt doithiem hochun ken jong hitia kaledoh kiguot ahi aty thei diu jieh a Pathen in amaho jouse ale sah masat a ajona bou a Yosef aledoh sah ahi. (Pathen thil guon ngan ahi)

Yosef in Pharaoh mang aledohna 

(פרשנותו של יוסף לחלום פרעה)

Egypt doithiem, miching, hetna jat chuom chuom nei hon Pharaoh mang aledoh mo kei phat uvin Ju-vaibolpan Yosef ahin geldoh tai. Ju-vaibolpan Pharaoh kuom a Yosef thu asei chu amadinga phatchomna hiding ham tia asei ahi. Ama geldan achu Pharaoh in thina tuh kha leh lengthah pan adinmun atusah dan lou khah diham tia agel ahi. 

Ju-vai-bolpan Pharaoh kuom ah “Mi ni chung ah chonsetna kanei e” Khat nachu Yosef  in nakuom a amin phah ding asei in hinlah kana minphah tapoi. Ani nachu nakuom a mang leh thiem khat kahet kanasei doh tapoi. Hitichun, Ju-vaibolpan Pharaoh kuom a Yosef mang ledoh dan asei pieh tai. Pharaoh suolchah hon apet pet in Yosef chu suongkul akuon aladoh uvin Pharaoh masanga ding din aguo tauve. Ju-vaibolpan Yosef sam leh khamul aho thieng pieh tai. Yosef in apa toh akikhen akuon sam tan lou chuleh khamul jong hou lou a Nazir tobanga um ahi. 

Yosef chun Pharaoh masang ahin puilut uvin Pharao in Yosef kuom ah - 

• Pharaoh - Mang khat kanei in, aledoh a hilchien thei koima aum pove. Ahin, nang hin, athu najah leh aledhoh thei e, ti thu kana ja e.
• Yosef - Mijouse mangledoh nachu adih poi tichu ipity nahet ham?
• Pharaoh - Ka mang achun aledoh najong kamu pei pei e, hijieh achu koiman ilhem lha thei ponte.
• Yosef - Mang ledoh nachu keima ah imacha aum poi, hijongleh Pathen in Pharaoh chu lungmuon'na thei khat in donbut nante.
• Pharaoh - Kamang ah Nile Vadung pang ah kading in, vadung akuon chun bongpi sagi hung kaltou kamu e... (Pharaoh chu amang chu detail a seilou a Yosef apatep ahi) 
• Yosef - Hichi chu namang ahipoi! Na mang ah bongpi jolsel, thautah chieh sagi namu e.
• Pharaoh - Adih e! Kahin patep gut nahi bou e.

Hitichun akihoulim nasung lhon achu Pharaoh in Yosef chu apatep ji ji in hinlah Yosef in asudih chet chet e. Pharaoh in "Ipity nahet ham? Kamang achu kakuom a nading ngap ngap ham aleh?" Pharaoh alung dong lheh e. Yosef chun Ruach Hakodesh akuon amang jong aledoh najong ahet thei ahi. Yosef in Pharaoh kuom ah hitin asei tai "Hashem in thuhil (Message/מסר) na pieh ahi, bongpi jolsel, thautah chieh sagi leh changvui hoitah bohlet sagi in avetsah chu kibang ahi, kum sagi neh le chah nieng ding tina ahi chuleh bongpi gu doh siet siet jieng sagi leh changvui geu thit thet sagi in avetsah chu kum sagi ma kil (Famine/רעב) umding tina ahi."

Yosef in mang aledoh jou chun Pharaoh kuom ah hitin asei e "thilsuoh ding chu guonchaisa a Pathen masanga um ahi e, hung lhung loi jieng ding ahitah jieh a Pathen in avela mang naneisah ahi. Hijieh chun miching, ijakai hethiem khat gamsung pumpi vaipuon pansah in chuleh vaibol dang jong koi inlang, ama hon neh le chah nien kum sagi sungin lhawsuoh jousie hop-nga a khat dong khom uhen" 

Pharao chu Yosef chung ah alung alhei lheh jieng in hichun hitin asei e "Pathen in hicheng namusah jieh in nang tobang hetna pha le chihna gil nei ding koimacha dang um poi, hijieh achu ka innsunga vaipuo'a kapansah ding, nang dei bang tah a mipi te ki vaipuo diu, ka laltouna chung seh seh a nang chung kahi ding ahi. Egypt gam pumpia vaipuo'a kapansah nahi tai" aty. 

Kihilna

(מוסר)

Hichilai akuon jildoh thei chu housatna leh vaichatna chule chih naleh thiepna jat chuom chuom jouse hi abon a Pathen khut a ki ngam suoh kei ahi. Yosef suongkul akuon Egypt gamsung pumpi apuh thei bang achun Pathen in jan kah a suoh hi'n atileh suoh kihi jieng ding, Leng kisuoh hen atileh kisuoh jieng thei ahi. 

___________________________