בס״ד
_________________________
Talmud Masekhet Kiddushin 20a sunga khun Rav Huna lu kiu a Amot 4 (Meter 2) kisan lam ajot lou thu akisei e. Aman hitin anasei e : Kachunga Sechina um a kei ipity lu kiu a kava lele thei ding ham aty.
Kippah in mihiem thil phalou akon avengdoh thei in chuleh achunga Pathen um jinge ti jong a geldoh sah in ahi. Talmud Masekhet Shabbat 156b akhun Rabbi Nachman bar Yitzchak asen lai in anu kom a Ahshi them hon nachapa ahung let teng gucha hung kisuh ding ahi ati peh uve. Rabbi Nachaman nu (Mother/אמא) in akicha in hijeh chun achapa Rabbi Nachman chu kippah toh kilha lou in aum sah jenge. Anu in ipi jeh a kippah lha lou hel a aum sah jeh vang Rabbi Nachman in ahepoi. Nikhat a kippah (lutom/כיסוי ראש) akhih sah in, ahung da doh doh in lushuga (Dates/תמרים) amun in amaho a ahilou ahet vang in duchat natah khat anei in hichun abah in aman in amun ma ma achun ane dan tai. Hichi thil suh jou akon chun Rabbi Nachman in a yetzar hara hatdan akihet in chuleh hijeh achu anun kippah toh kilhen lou a aum sah jeh jong ahin kihet doh tai.
Halacha lampang a iseiding leh kippah hi minhag Hasidut akon ahung kipan ahi. Aphat hung chi dungjui in minhag Hasidut pahi mijouse in ahin chipi uvin tu nikho’n hichi minhag pahi tei tei dan in ahung um tai.
Pathen gin na aum jing thei nading in Chachamim khan khat in jong kippah/lutum jaolou a amot 4 (Meter 2) kal val lam jot lou ding ahe kity pahi achepi uve. Hichi jeh achu hui a hat teng, ilu chunga kippah beh thei hih jong leh ikhut a kitu ding chuleh khuh tei tei ding ahi.
“Igrot Moshe” kity lekhabu akhun Rav Moshe Feinstien in thudoh hoitah khat asei e. Israel gampam a cheng Juda mikhat chun kippah khuh lou a naa atoh ding hitahen ahilouleh kippa akhuk jeh in natoh akimu lal ding hitaleh, hichi dinmun achu ipity chonding ham? Kippah chu akhuh tei tei a natoh dang akihol kitding ham? ahilouleh Kippah khuh lou a naa chu atoh jeng ding ham? Kippah chu minhag ahin hijeh achu kippah khuh lou a natoh akimu ding ahileh kippah akhuh angai poi. Torah akon kipe mitzva ho kisan seiding a, Etrog kisan bon sum inei jouse sen a choh ngailou ahileh (Kal ve Khomer) Kippah chu minhag mei mei ahin, minhag jeh a neh holna (Livelihood/פנסה) aum louding le kippah akhuh tei tei angai poi.
Kippah size hijat ahi tei tei angai e ti um am? (Specific size). Rabbi Shlomo Kluger hi kum 150 masang vel achu poskim lah a alen pen khat ana hi in, ama seidan in lu kiu (ראש מגולה) a umchu dan dungjui in phal ahipoi, Lu kiu a amot 4 (Meter 2) lamjot ding jong phal ahipoi chuleh kippah hin luchang atamjo akhu (Cover/כיסוי) ding ahi. Ahin, poskim khan khat sei dan in Kippah in luchang atamjo akhuding ahi kity hi tei tei ahipoi ajeh chu kippah kikhuh lo napen chu ichunga Pathen aum e ti geldoh jing thei nading ahi. Hijeh achu alet le neo pachu a poimo beh seh poi.
Rabbi Shlomo seidan chipi hochun kippah alen dew akibol ding ahi, ajeh chu Tukhang ahi kippah kikhuh pachu Torah le Mitzvot jui ahi kity hettheina Identity a um ahitai. Hichi Identity pachu akihet thei nadinga kippah chu anung, ama, asih akon akivet teng jongleh adoh ding khat ahi angai e, hichi ado thei nading achu kippah len khuh angai e.
Kippah kikhuh lou a Tao, Hou-inn lut, Pathen min sei, chuleh Bracha sei phal ham? Adonbutna : Rabbeinu Yarukham, Rishonim khang lai a alenpen khat ana hi in, Ama seidung jui in kippah jao lou a Hou-inn lut, Toana man tiho hi phal ahipoi. Mikhat chu alam jot pet in a kippah hui in alhoh mang pih taleh aluchanga akhut akoi a alam jot ban ajotbe thei ahi, hichi chu kippah jaolou a amot 4 lamjot in akisem poi. Ahin mikhat chun Houn-inn lut, Toana, Bracha, Pathen min sei, ti ho abolding ahitah levang kippah khel a aluchunga akhut akoi chu phal ahikit tapoi ajeh chu akhut chu ama tahsah ma ma ahi (Ein haguf mekhase et atzmo) Hinlah midang khat in aluchunga akhut angap peh le phal ahikit e.
Example - Thil kaneh gut, hinlah Bracha sei nadinga kippah kanei lou ahileh kaloipa khat in kaluchung a akhut ingap peh a chuleh ken Bracha chu kakisei thei ahi.
Achunga kisei bang achu Pasal in Bracha sei nading, Pathen min sei nading, Taona nading chuleh Hou-inn lut nadinga kippah akikhuh a ngai e. Numei in hichi kisei ho bol nadinga Mitpakhat akhuh ngai ham? Hichilai dinmun ahi numei le Pasal aki khih na ipi ham? Pasal in kippah akikhu jih chu ihethem tau uvin. Numei in mitpakhat akikhuh jih chu Tzinut (Modesty/צניעות) jih ahi. Hinlah numei hihen pasal hileh alu kitum lou a hichilai kisei hohi abol phallou ahi.
Sulchan Aruch (Orach Chaim 91, 3) akhun halacha khat posek akibol in hichi halacha achun lutum lou a Hou-inn lut louding chuleh Pathen min phah louding etc..akity e.
__________________________