בס״ד
Yalkut Yosef - ילקוט יוסף
- Avrekh Gidion Haokip
____________________________
1. Chondan dung juiya khanukah teng numei hon thaomei nidan keh avah sungse a natoh ima abol pouvin, vetsahnan, puonkhui, puonsop chuleh adang dang, ahinlah neh le chah toh kisamkai tichu ann huon, ho ahilevang abolthei u ahi.
2. Khanukah sung’a ann-ngol phallou ahi, hijeh a chu mikhat anu ham apa ham thi nikho chu khanukah sung’a achuh khah a ahileh khanukah masang’a ann angoldoh ding ahi.
1. Hiche khanukah thaomei hi ni giet sung akide in, animasa nileh khat akide in, ani nih nileh ni akide in, hiti chun anikho achie dungjuiyin thaomei jong akibelap in ahi.
2. Khanukah thaomei det ding thupieh hi insung’a mikhat (mipa) in adet leh a insung mijouse jong ahop tha tan ahi. Askenazi hon vang amitakep in adejiuvin ahi.
3. Insung’a thaomei deding miipa aumlouleh minu in jong ainsung mijouse ajipa puma ahoptha ding’a thaomei adet thei ahi. Hiche thaomei detding thupieh a hin numei leh pasal dinmun akibang’in ahi.
4. Khanukah thaomei hi ahoipenna insung lutna, Mezuzah umlouna lang kot koma tunding ahi, ahin building sang a cheng ho ahilevang, building huikot koma khat’a atuna detding ahi.
5. Khanukah thaomei hi jaan ahsi thum (tzet hakokhavim) akimu apat a det pan thei ahi, hiche masang’a vang det got louding, jaa ahilaise, tichu kho avah masangse a Thangvahna puma thaomei det thei ahi. Ahin kho avah a ahilevang thaovahna umlouva det ding ahi. Ahoipena ahsi thum so apatna nidang kehkhat sung’a khanukah thaomei det ding hi thilhoitah ahi.
6. Thaomei idet masangleh hetding a poimo chu, thaomei idet ding chu idet jouva pat nidan kehkhat beh avah jouding ngai ahi. Nidan kehkhat beh avahjou louding ahileh khanukah thaomei detding thupieh akisubulhit poi.
7. Mikhat chun iti ham khat a nidan kehkhat vah jou louding thaomei adet khahtah’a, adet jouva ahin hetdoh a thaotwi tampi asun be hijongleh thupieh asubulhit lou ahi. Hijeh a chu thwotwi sunbe hilouva, thaomei adetsa chu asuhmit a, chujouteng nidan kehkhat beh avahthei na ding’a thaotwi asunbe a hitia chu avel a thangvahna umlouva athah det ding ahi.
8. Khanukah thaomei chu jetlang’a pat veilang’a tunding, idet tengleh veilang apat’a jietlang a detding ahi. Chuleh hetding a poimo kit khat chu thaomei idet tengleh, thaomei chu nidan kehkhat avahsung’a hui in asem mit jou louding ahi angaiye. Iti hamkhat’a hui in asem mit ding ihet a thaomei chu idet leh thupeh kisubulhit lou ahi. Ahin hiche hui kisei chu phatseh’a nitin a um hui kiseina ahin, nitin a umkhalou hui kiseina ahipoi, tichu mikhat in khanukah thaomei nidan kehkhat sung vahjou ding adet a, athaomei adet joug chu nitin a um hui holah’a vahjou ding ahi a nidan kehkhat avah masang’a hui hattah, nidang’a umkhalou in ahin mutmitkhah a ahileh, nidan kehkhat vahnailou hijongleh thupieh asuhbulhit ahitan, avela athah det kit angaipoi.
1. Khanukah thaomei vahna ding’in thangvahna thum aumin ahi:
a)Lehadlik Ner Khanukah
b) Se asah nisim la avotheinu
c) Shehekhiyanu - Jan masapen nileh
Ahin, shehikhiyanu thangvahna hi animasa nileh akiseiin, aninih apat in, Lehadlik her khanukha le She asah nisim la avotheinu bou akisei tai.
2. Mikhat chun itiham khat’a animasa nileh thaomei detpet’a shehikhiyanu thangvahna anasei haimil khah a thaomei nidan kehkha avah sung’a ahin geldoh a ahileh, shehekhiyanu thangvahna aseithei nahlai ahi. Hiche nidan kehkhat sung’a jong ahin geldoh louva ahileh, aninih leh aseiding hitia chu achaini kah’a khanukah thaomei det masang ham ahilouleh adet jouva nidan kekhat sung’a seithei ahi.
3. Mikhat chun thangvahna seilouva khanukah thaomei anadet khahtah a ahileh, thaomei adet ding tichu anithum ni a thum lah’a ani ana det’a khat det nailou aumnahlai a ahileh, thangvahna aseitheinahlai ahi, ahin athumna anadet jouva thangvahna aseilou ahin geldoh a ahileh thangvahna Lehahlik ner khanukah aseithei tahlou ding ahi, ahin thangvahna She asah nisim vang aseitheinahlai ahi. Ipi chu hileh thangvahna seilouva anadet hijongleh thupieh asuhbulhit ahi.
4. Khanukah teng Hanerot halalu la akisaji in, hinlah chihthei ngai chu ahileh thangvahna jouse iseijouva khanukah thaomei amasapen idet jou tengle bou sah pan bep ding ahi.
5. Khanukah thaomei vah akuona nopsahna tichu avah akuona sum gahsim, ahilouleh Torah gam sim hijongleh phallou ahi.
6. Chondan dungjuiya Beith Knesset muna jong khanukah thangvahna pumin mei akivah jin ahi. Ahin hiche beith knesset a khanukah thaomei kivahna akuona thaomei detding thupieh (mitzvah) kisubulhit theilou ahin, inn a kide thaomei akuona bou thupieh kisubulhit ahi.
7. Khanukah sung’a kholjin ham ahilouleh mundang’a lekhasim khat chun, ainn koten khanukah thaomei adet uva ahileh, amapan akhojinna muna ahilouleh alekhasim na muna thaomei adet ding angaipon ahi. Ajeh chu ainn koten thaomei adet uva kuona amajong ahoptha ahitai.
8. Khanukah kut sung’a khatvei shabbath toh akitoh in, nidang a ahsi thum asoteng thaomei dejongleh, hiche sabbath toh kitoh Friday niteng khovah, Sabbath thaomei det masang’a (khanukah thaomei) det ding ngai ahi. Hiche jeh a chu hiche Friday nia Sabbath thaomei det masang’a khanukah thaomei adet ding teng, nidang’a thaotwi asunsang’a tamjo asun ding, tichu adet jouva pat ahsi thum so jou nidan kekhat changei beh vahjouding thaotwi asun ngai ahi.
9. Khanukah ni giet sung se a taona (Amidah) leh Birkhat hamajon teng “Al hanisim” akibelap in ahi. Chuleh hiche ni giet sung shakharith teng Hallel pumpi (full hallel) thangvahna pumin akisim jin ahi. Numei hon vang Khanukah sung’a Hallel asimlou ding u, asim nom uva ahileh thangvahna “ligmor eth hallel” seilouva asim thei u ahi.
Note: Mipi koma kaseinom chu ahileh, hiche khanukah halakha hung kijih hi achomlam thei pena hung kijih ahin, ihettheim lou u auma ahileh ikidoh chet thei u ahi.