Aseret Yamei Tsuva
בס״ד
The Ten Days of Repentance
______________________________
Rosh Hashana apat Yom-Kippur chan hi Aseret Yamei Tsuva akity. Hichi phat sung ahin Pathen in asiemsa chung jouse in thutan na anei e. Adih in eiho (Juda te chung a) chung ah thutan nachu akhou dihset e. Chuleh hichi phat sung ahin Pathen in akum kit adin hinkho thah asieme (Leiset a thah siem hilou in, a kum kit a koi hingding/thiding sut lutna anei e). Hichi phat sung ahin atao/akou jouse dingin Pathen anai dihset e chuleh adonbutna jong phatdang sang in ahoi dihset e. Rosh Hashana nia ahi ithu'u akitan in thina lekha/hinna lekhabu sunga imin'u akisunlut in, Yom kippur nileh khatima/sign akibol e vetsah chu Rosh Hashana nia thina lekha bu a amin kisunlutpa jong aseret yamei tsuva sunga akisiem thah le Yom kippur nile Pathen in khatima abol masanga hinna lekhabu a kisun lut kit thei ahi.
Isaiah 55:6 "Mutheiya aumpet in Pakai chu holin, nailama aum pet in ama chu kouvin" Hichi phat sung ahin mikhat tsuva bol jih ajong Israel pumpin aphat chompi thei e (Psikta Rabaty). Hichi jih achu mihiem khat chun aumchan phalou jouse chu avel bol louding kisiemthah ding ahi.
Rambam Hilchot Tsuva 2:1 Koi tabang chu Tusva dihta (Tsuva G'mura) nei kity ham? Mihiem khat chun anachonsetna tabanga, vel chonset kit theinading phat lemchang anei kit a, a'tsuva boljih a achonset tah louleh amapachu Baal Tsuva dihta ahi. (Rambam hilchetna dungjui in Tsuva bol ding dan level 4 aum e, chilai kisei pahi level 4 na chu ahi)
Hetding a poimo chu hichi phat sunga ahi Kashrut lampang jong dan khou cheh a jui angai e. Tekah in mikhat chu Kosher sa (Meat/בשר) ana nejing jongleh Aseret Yamei Tsuva sung ahi Glat Kosher/גלאט כשר aneh ding ahi. (Glat Kosher - Basar Khalak)1 chuleh hichi phat sung ahi Birkat Hamazon masang a Maim Akhronim bollou honjong abol diu chu ahi. Hichi phat sunga kisiem thah lou/Tsuva bollou a chonse michu'n thil pha tamtah amansah ding ahi. Athilpa boldoh jouse jong asuse thei in, aki mansah thei e.
Kohelet 9:18 "Michonse khat chun thilpha tampi asuse jeng theiye" "Ha-khote ekhad ya'abed tova harbe"
Aseret Yamei Tsuva sunga Torah jil le thilphabol | תורה וחסד.
Khakhamim hon asei ubang in "HaTalmud mevi lidei ma'ase/Talmud akon umchanpha ahung kondoh e" (Kiddushin 40b) chijih achu umchan pha nei thei nadia chiphat sung ahi Torah hajil ding ahi. Elul lha apat Aseret yamei tsuva sung ahi jil dia hoipen chu Mussar lampang ahi. Torah jilna hakipih pachu, aTorah jilna jal a achonsetna chung a gotna amu nadia kon kihuh doh thei e. Nikhat a Torah jil a page khat khat jil hon hichiphat sung ahi page 2 ajil diu, nikhat a perek 1 jil ji pan perek 2 ajil ding ahi. Torah jil theilou/lekha sim thei lou hon Tzedaka habol a abol diu ahi, ahinkho'u achonset nau akon akihuh doh thei nadinga. Rabbi Akiva in hitin asei e : Tzedaka tatzil mi-mavet/Tzedaka in thina akon i'huh doh thei e (Masekhet Shabbath).
______________________________
1. Glat Kosher - English - Smooth, Hebrew - Khalak, Yiddish - Glat.
