Hadlakat Nerot

בס״ד

______________________________

Dvar Torah

Hadlakat Nerot (Meivah/Meidet) hi chachamin ten ahin guot'u mitzva khat ahi. Hichie mitzva liet dan hi, meivah choh nading sum nei lou hon jong khutdo liu a mi kuom a sum athum thei'u ahi. Shabbat meivah hi innsung salvah a pang ahi, ajieh chu meivah jaolou a an kine chu atui na a'alna chuleh anopna kihe thei louding ahi.

Numei hon mitzvah 3 hoitah a ajui lou uleh achaneina uvah thina atuh thei uve - Niddah, challah chuleh Hadlakat Nerot Shabbat (Mishna Shabbat Perek 2, Mishna 6)

Rav Huna in Hadlakat nerot Shabbat leh Chanukah hoitah a jui hochu chapa Torah hetgilna anei ahin nei diu ahi ati. Shabbat nilhah sieh leh Rav Huna in Rabbi Avin inn (House/בית) ahin jot pa ji in, Shabbat meivah hoitah a kide amu jie in chuin Rav Huna in "Hichie insung akuon Torah hegil mi (Talmid Chacham) ni beh hung kuon doh inte ti'n asei e." Phat ahung chal in Rabbi Avin chate ni Rav Idi bar Avin leh Rav Hiyya bar Avin chu Torah hegil mi ahung kisuoh lhon tai. (Masekhet Shabbat 23b)

Birkat HaZevakh lekhabu sunpa Rabbi Aharon Shmuel Kaidnover nu (Mother/אמא) chun taona asim thei pon hinlah achapa adin Shabbat mei avah tieng lunglut tah in alungsung akuon taona aman pieh jie, ataona chu akisan pieh in Torah hegiltah chapa Rabbi Aharon Shmuel Kaidnover ahin nei e.

Rabbeinu Bachyai ben Asher in Parashat Yitro commentary ah hitin asun e, Numei hon mei avah tieng uleh Torah hegil chapa anei nading in atao'u apha e ajieh chu mitzvah kibol pet a taona kimang pahi aguilhung nuom e. Shabbath meivah in insung asalvah in, Torah in leisiet asalvah e. (Mishlei 6:23) "Mitzvah hi thaomei ahin Torah hi ameivah ahi."

Shabbat meivah hoitah akiguot ding chuleh aphat chet a vahding, Shabbat lut kuon cha a vahlou ding ahi ajieh chu akivah gei leh Shabbat a mei kivah tobang ahitai, Shabbat kipal keh ahitai. Chazon Ish in "Shabbat kipal keh a mitzvah bol sang in bollou apha joe" ati.

______________________________

Halacha

Mikhat chun Shabbat a thil khat choh nading bou sum anei leh lechem (Changlhah) akichoh masat pending ahi, nehding anei nadia. Sum val anei leh yain sang a meivah ding akichoh ding ajieh chu kiddush bolna a yain khel a kimang thei ahi. (Pninei Halacha Perek 4 Halcha 1)
Halacha dungjui achu mei 1 bou vahding ahi in hinlah alhangpi in mei 2 vah akichi pi e. Khan khat in 2 sanga tamjo avah uve ajieh chu mei itam detchan achu mitzva bol jong len cheh ahi. Khan khat in mei 7 vah achipi uve. Innsung mi jat mei vah jong aum kit e, naosen apien be le ameivah jat jong abelap uve. (Yalkut Yosef Shabbat 1 Amud 132)
Meivah 7 ana vah jieng nu chun sum hahsat jieh ahilouleh thil dang dang jieh a 2 avah nuom tah leh, mi 3 masanga Hatara (Kitipna lhep lhah) abolding ahi. Hinlah bli neder (Kitepna jaolou) ana ti ahile vang Hatara chu bol angai poi. Buina jeh a khat vei bou 2 adet nuom ahileh vang bli neder ana tihih jongleh hatara abol ngai poi. (Yalkut Yosef Shabbat 1 Amud 135)
Hadlakat Ner Shabbat hi numei pasal ani adia mitzva ahi hinlah pasal sangin numei in avah ding deisah joh ahi. Insunga numei aum tahlou leh pasal in avah ding; numei aum levang pasal in avah ngai lou. Hinlah insunga Shabbat mei kivah dichu pasal pan akhoh sah ngai e. Ajinu'n adet heipang jongleh aseipieh ding adet gei jongleh ano ding. (Yalkut Yosef Shabbat 1 Amud 142)
Numei um na mun a meivah chu numei nu kin hita jongleh pasalpa'n ameivah ding agun pieh ding chu aphai. Tekahnan, pasalpa'n thao athunding apat (Ptil) akoiding/Candle tun'na a candle ho atunding chuleh numei nu adia abon a guontuh sa akoiding numeinu'n meivah leh Bracha bou abol ding. (Yalkut Yosef Shabbat 1 Amud 143)

______________________________

Glossary

Bli Neder - Kitepna bei/Kihahsielna bei.
Challah - Changlhah.
Hadlakat Nerot - Thaomei vah.
Hatara - Kitiepna/Kihahsielna ki lheplhahna.
Niddah - Lha siet a thi nei.
Ptil - Thaomei lei [English - Wick]
Shemen - Thao.
Yain - Lengpi ju.

_____________________________

Comments